Presse et archive

Leserbriefe et textes publiés

Choisissez un titre dans l’archive pour lire la lettre complète. Le journal d’origine reste accessible lorsqu’un lien est disponible.

← Choisir une autre lettre

De Sport soll Brécke bauen, net Maueren

De Lieser freet sech, dass Lëtzebuerg déi Initiativ net ënnerstëtzt, déi russesch Sportler weider vun internationale Kompetitiounen ausschléisse wëllt

Ouvrir le journal original ↗ Le journal peut demander un abonnement.
Ech hunn Ären Artikel „Warum neun EU-Länder gegen Russlands Sport-Comeback vorgehen und Luxemburg nicht mitmacht“ mat vill Opmierksamkeet gelies. Ech si frou, datt Lëtzebuerg sech net un der Initiativ vun néng EU-Länner bedeelegt, déi sech géint de Comeback vu russesche Sportler ausschwätzen.

De Krich an der Ukrain ass eng mënschlech Tragedie. All Affer ass een Affer ze vill. D‘Biller vu Kanner, Familljen a Mënschen, déi alles verléieren, loossen eis net kal. Mä grad an esou schwieregen Zäite musse mir oppassen, datt mir net dat zerstéieren, wat Mënschen nach zesummebrénge kann: de Sport.

Fir mech ass e Sportler net als éischt e Pass oder eng Nationalitéit. Et ass e Mënsch. Een, deen zënter Jore mat Leidenschaft trainéiert, op villes verzicht huet, a säi Liewe sengem Sport gewidmet huet. Déi meescht Athleten hunn ni eng politesch Decisioun getraff a si droen och keng Verantwortung fir d‘Handlunge vun hire Regierungen.

Wa mir ufänken, Sportler nëmme wéinst hirer Nationalitéit auszeschléissen, da verléiert de Sport seng eigentlech Bedeitung. D‘Olympesch Beweegung ass gegrënnt ginn, fir Brécken tëscht de Vëlker ze bauen an net fir nei Maueren opzestellen. Wa mir dës Wäerter opginn, verléiere mir e Stéck vun eiser Mënschlechkeet.

Wat fir de Sport gëllt, soll och fir d‘Kultur gëllen. Och Konscht, Musek, Literatur an Theater sollte Brécke schafen an net zu neie Grenze féieren.

Ech begréissen dofir d‘Haltung vu Lëtzebuerg. Heiansdo brauch et Courage, net dem Drock vun der Majoritéit nozeginn, mee de Wäerter trei ze bleiwen, déi eis zënter Joerzéngte begleeden: Dialog, Respekt a Mënschlechkeet.

Mir däerfen d‘Affer vum Krich ni vergiessen. Hiert Leed verdéngt eise ganze Respekt an eis Solidaritéit. Mä mir däerfen och net zouloossen, datt Haass ëmmer méi Plaz kritt an och déi trëfft, déi näischt mat dësem Konflikt ze dinn hunn. Fridden entsteet net duerch ëmmer méi Ausgrenzung, mee duerch Courage, duerch Dialog an duerch d‘Bereetschaft, de Mënsch am anere weider ze gesinn.

De Sport wäert de Krich net ophalen. Mee wann en et fäerdeg bréngt, och nëmmen eng eenzeg Dier fir den Dialog opzeloossen, dann huet e seng Missioun erfëllt. Genee dofir sinn ech houfreg, datt Lëtzebuerg dëse Wee gewielt huet.

Celestino Fecchi,
Zolwer